Gryndig vo de Miggeli-Schränzer 1987

 Am 20. Meerz 1987 sinn siibe Fraue im Glaibasel zämme gsässe und hänn sich e paar Gedangge gmacht fir e neyi Gugge. Als allererschts händ mir e Namme gsuecht. Do derby sinn zur Uuswaal: „Panzerknagger, Gliewyrmli und Miggeli“ gstande.

Nach langem Hi und Här het me sich fir dr Name „MIGGELI-SCHRÄNZER“ entschiide. Do jo nur Fraue als Aktivmitgliider derfe mitmache passt dä Namme ganz guet, denn Miggeli het me friener zer jungi Fraue gsait.

Nachdäm me s’erschte Broobelokal im St. Johann-Schuelhuus gfunde het, het’s kenne los go, Broob fir Broob. Im Joor 1988 händ mir s’erschtmol an dr Basler-Fasnacht als Miggeli-Schränzer mitgmacht. Am Cortège sind mir den mit 17 Fraue als Miggeli gloffe.

S’erschte Miggeli-Schränzer Signet isch e Glööglibaum gsi, aber gly het me gmerkt, ass en alti Dante sinnvoller wäär. So isch bis hit s’Woorzaiche vo de Gugge en Alti-Dante.

Es isch immer wiider schwiirig neyi Fraue z’begaischtere zem Musiziere. Trotzdäm lauffe mir bis hitte mit 28 Aktivi, scho iiber zwanzig Joor, und hoffe no uff wyteri gliggligi Joor.
Update am:
17.10.2017
18:00 Uhr

Neuigkeiten


SF METEO